Млада припадничка на француските воени сили обвини свој колега за силување во претседателската палата во Париз, јавуваат денеска француските медиуми. Настанот се случи во јули во 2021 година, а француската претседателска палата до сега го чуваше случајот во тајност.
Младата припадничка на воените сили, наводно, била силувана од војник во Елисејската палата на 1 јули, кога во присуство на шефот на државата била организирана проштална забава за тројца соработници на претседателот Емануел Макрон.
По неговото заминување во 22 часот, ситуацијата почнала да се „вжештува“, наведува парискиот „Либерасион“.
По официјалната церемонија во паркот, забавата продолжила во исклучително безбедни простории во кои секојдневно се ракува со чувствителни досиеја, главно класифицирани како доверливи или тајни, пренесува Танјуг.
И токму таму, како што изјави младата припадничка на воените сили, се случило силувањето. Жртвата отишла во полициската станица и го пријавила сексуалниот напад, а обвинителството на 12 јули одлучило да отвори судска истрага.
Полициската управа задолжена за случајот го испрашала осомничениот, кој добил статус на соработник сведок. Елисејската палата соопшти дека никогаш нема да коментира за тековните случаи.