Регулаторната комисија за енергетика (РКЕ) најавува дека ќе ги заштити потрошувачите онаму каде што има влијание, а најавените максимални барања на енергетските компании за поскапување на струјата ќе ги сведе на минимум во опсег на реални основни трошоци кои се неопходни за системот да функционира. Во изјава за Нова ТВ, регулаторот во овој кризен период, повикува на солидарност и системски пристап и на компаниите, но и на државата.
– Откако сите енeргетски компании ќе достават барање, РКЕ ќе велезе во детални анализи и затоа што ова е атипична година кризна. РКЕ ќе ги активира механизмите за замрзнување на дел од профитите, онаму каде што има влијание. Што значи дека РКЕ ќе ги заштити потрошувачите онаму каде што има влијание, врз цената од ЕСМ и обновливите тоа е утврдено веќе однапред. Ние знаеме дека повторно со тужби ќе се соочиме. Но, во кризна година мора сите да се солидарни, порачуваат од Регулаторната комисија.
Како што Нова ТВ објави претходно, МЕПСО денеска и официјално го достави своето барање во кое се вкалкулирани трошоците што биле направени од загубите во мрежата за кои, како што ни изјави директорот Куштрим Рамадани, ќе изнесуваат 23,4 милиони евра поради зголемените цени на електричната енергегија на берзите. ЕВН електродистрибуција претходно побара 100 отсто зголемување.
– Најавените максимални барања ќе ги сведеме на минимум во опсег на реални основни трошоци кои се неопходни за системот да функционира. Мора оваа енергетска криза да има системски пристап и државата да ја прошири листата на ранливи потрошувачи и да им се помогне на семејствата кои се соочуваат со потешкотии во плаќање на сметки, велат од Регулаторна.
Наспроти, најавите на некои медиуми дека зголемувањето на цената на струјата би можело да биде и до 40 отсто, министерот Крешник Бектеши денеска изјави дека нема да има поскапување поголемо од 10%.
Стојанка Митреска