Со транспаренти и маички „Почивај во мир ангелу наш“ и „Стоп за сообраќајното насилство“ стотина луѓе се собраа денеска на мирниот протест на крстосницата на „Партизански одреди“ кај „Сити Мол“, каде пред 10 дена, на 20 јануари, загина 24-годишната Викторија Николова од Радовиш, покосена на пешачкиот премин од две години помлад скопјанец Ј.Ѓ.
На протестот, кој го организираше момчето на Викторија, Леонид Даов, кој беше полесно повреден во истата сообраќајка, присуствуваа и членовите на семејството на Викторија и нејзини сограѓани.
Граѓаните палеа свеќи, изразувајќи почит за трагично згаснатиот млад живот и порачаа СТОП за сообраќајното насилство, да се подигне свеста на учесниците во сообраќајот и да се стави крај на безобѕирното возење по улиците, за да нема одземање невини животи.
На 22-годишниот возач од Скопје дента по несреќата му беше одреден 30-дневен притвор.
Како што тогаш соопштија од Основното јавно обвинителство (ОЈО) „според првичните сознанија, до несреќата дошло кога патнички автомобил „Цитроен Ц4“, управуван од лице на возраст од 22 години, удрил во двајца пешаци, девојка и момче на возраст од по 24 години, кои поминувале преку улицата. Од здобиените повреди, оштетената починала на лице место, додека другиот пешак е повреден и пренесен во болница. По наредба на јавен обвинител, возачот на автомобилот веднаш по несреќата е лишен од слобода и задржан во полициска станица. Јавниот обвинител издаде наредба за обдукција на телото на починатата, а нареди и вештачење на примероци од крв и урина од возачот на автомобилот со цел да се утврди дали тој управувал со возилото под дејство на алкохол или други недозволени супстанции“.
Според Кривичниот законик, максималната казна за нанесување тешка телесна повреда со смртни последици е 15 години затвор.
(FOTO 24info.mk)