Почна општиот претрес по Предлог законот за изменување и дополнување на Законот за минимална плата на редовната 62 пленарна седница во Собранието, откако тој во второ и трето читање ги мина матичните Комисии за труд и социјала и законодавно-правната.
Предлог законот пред пратениците го образложи министерката за труд и социјална политика, Јованка Тренчевска, која рече дека новото законско решение било подготвено низ еден инклузивен и транспарентен процес преку дијалог со социјалните партнери, работниците и работодавачите.
„Низ тој дијалог се донесе решението кое е општо прифатливо за сите партнери, а поддршка дадоа и Синдикатите. Очекуваме дека со порастот на минималната плата, ќе се влијае на порастот и на другите плати во индустријата што ќе придонесе за поквалитетен живот на сите работници“, рече Тренчевска.
Во однос на зголемувањето на останатите плати, надвор од минималната, министерката Тренчевска вели дека тоа е регулирано со Колективните договори.
Пратеничката од Алијанса за Албанците, Илире Даути им забележа на пратениците од власта дека не ги прифатиле нивните амандмани.
„Како пратеничка група, во Комисијата за труд и социјална политика, отидовме подготвени со амандмани со цел да го подобриме квалитетот на Законот како би се зголемиле и останатите плати во јавниот сектор. Баравме зголемување на буџетот за дополнителни 4 милиони евра со кои ќе бидат покриени сите даноци поврзани со зголемување на минималната плата, се со цел овој товар да не падне врз грбот на стопанствениците“, рече пратеничката Даути.
Од опозициската ВМРО-ДПМНЕ, повторно побараа скалестото покачување на платите да биде опфатено со Предлог законот за минимална плата. Оттаму алармираат дека потрошувачката кошничка за 30 дена се зголемила за дополнителни 700 денари, поради што велат потребно било зголемување на сите плати, а не само на минималната.
„Ние бараме Владата да ги почитува колективните договори кои самата ги има потпишано, а со тоа да се спречи феноменот на урамниловка. Веќе реагиравме дека вака, како што е конципиран, Законот ќе доведе до ситуација во која од 16 позиции во градонките на 9 позиции да има порамнување на платите, или пак кај средните училишта, од 10 работни позиции, кај пет да има порамнување, со што ќе се изгуби вредноста на коефициентот на сложеност на работните места“, рече пратеникот на ВМРО-ДПМНЕ, Бојан Стојановски и апелираше до Владата во рок од 30 дена да се направи усогласување на Законот за минимална плата со Колективните договори, а тој што нема да го почитува усогласувањето да сноси кривична одговорност.
Предлог измените на Законот за минимална плата се резултат на постигнатиот договор помеѓу социјалните партнери, Владата, Сојузот на синдикати и Организацијата на работодавачи. Преговорите доведоа до утврување на нова методологија за пресметка на минималната плата, која според надлежните, треба да обезбеди долгорошно решение за раст на минималецот без разлика која политичка партија е на власт.
Критериумите од новата методологијата предвидуваат годишно усогласување на минималната плата со 50 проценти од годишниот раст на просечната плата и 50 проценти од растот на трошоците за живот, а висината на минималната плата нема да може да биде пониска од 57% од просечната плата објавена според Државниот завод за статистика.
Откако Законот ќе мине во Собрание 80.000 сограѓани, работници во различни индустрии, почнувајќи од мартовската плата ќе земаат најмалку 18.000 денари, или или 61.8% од просечната плата во земјата. Платата ќе се исплаќа на почетокот на април.
Во моментов 72.000 работници земаат минимална плата од 15.200 денари.
(Б.Божиновска)