Амбасадорите на земјите членки на ЕУ попладнево постигнаа договор по барањата на овие три земји да поднесат апликација за членство во ЕУ, а сега Комисијата е на потег.
Како што информираа од француската делегација, која претседава со Советот на ЕУ до крајот на јуни, амбасадорите на 27-те земји членки попладнево дадоа зелено светло Европската комисија да ги разгледа кандидатурите на Украина, Грузија и Молдавија.
Европската комисија сега има задача да анализира и да објави мислење за евентуалното членство на овие три земји во Европската Унија. До сега Украина, Молдавија и Грузија не беа дел од процесот на проширување, за разлика од Западен Балкан. Со оваа одлука се отвора можност да се промени оваа состојба.
Претседателот на Европскиот совет Шарл Мишел денеска најави дека лидерите на ЕУ во следните неколку дена ќе разговараат за апликацијата на Украина за членство во ЕУ.
„Во наредните денови ќе разговараме за апликацијата на Украина за членство во ЕУ“, напиша Мишел на Твитер.
Следна можност да се разговара за ова прашање е неформалниот самит што ќе се одржи во четврток и петок во Версај.
Засега од Европската комисија нема одговор на прашањето дали има рок кога ќе се објави мислењето за кандидатурата на трите источни земји.
Украина е земја во војна, а Молдавија и Грузија се составени од сепаратистички територии, што несомнено ќе го усложни процесот на пристапување кон ЕУ.
Некои земји членки, пред сѐ источноевропските, бараат брза процедура на членство за Украина, но и Грузија и Молдавија, како одговор кон воените дејствија на рускиот претседател, но околу ова нема консензус во ЕУ, каде проширувањето останува чувствителна политика.
За брза процедура на зачленување, дипломатите објаснуваат дека тоа би морало да биде одлучено на ниво на шефови на држави и влади на ЕУ.
Инаку, француското претседателство со Советот на ЕУ го планираше состанокот првенствено да разговара за европскиот модел на раст и инвестиции до 2030 година, но руската инвазија на Украина, кандидатурата за членство на Украина и безбедносната ситуација во Европа најверојатно ќе ја засенат првично планираната тема.
Извор: МИА