Украинскиот претседател Володимир Зеленски предупреди дека заканата за неговата земја е „на максимално ниво“, но потврди дека и одговорот на Украина е исто така највисок.
Додека војната веќе трае две недели и милиони цивили ја напуштаат земјата, Зеленски рече дека украинската армија ги надополнува воените арсенали со оружје и залихи запленети од Русите во борба.
„Нашата војска успеа да го надополни арсеналот на муниција со многу трофеи земени на бојното поле. Непријателските тенкови, оклопните возила и муницијата ќе работат за нашата одбрана, нашиот живот, нашата земја. Што може да биде попонижувачко за противникот? Ќе се бориме против непријател со неговото оружје, покрај нашето“, рече Зеленски.
Зеленски, исто така, упати апел до руските војници, говорејќи на руски: „Заминете“. Зошто сте тука? Можете да се спасите само ако заминете. Вие ни ги земате животите и ги губите вашите. Да ја завршиме оваа војна и да се вратиме на мирот“, рече тој во пораката до руските војници.
До меѓународната заедница Зеленски упати порака уште еднаш: „Затворете го небото. Испратете ни авиони за да избегнеме масовна хуманитарна катастрофа. Украина им го кажува ова на своите партнери од првиот ден на војната: Ако не го затворите небото, ќе бидете одговорни и за оваа огромна хуманитарна катастрофа“, рече Зеленски.
Украинскиот претседател обвини за руската употреба на ракети и хеликоптери против цивили, градови и инфраструктура.
„Слушајте, ние сме во војна. Немаме време за овие медиуми, за сигналите… ова не е игра на пинг-понг. Станува збор за човечки животи. Ве молиме уште еднаш: донесете ја вашата одлука брзо. Не ја префрлајте одговорноста еден на друг. Испратете ни ги авионите“, апелираше тој уште еднаш до меѓународните партнери.