Лидерот на ВМРО-ДПМНЕ, Христијан Мицкоски, однесе победа во две тужби за клевета и навреда кои ги поднел, едната против СДСМ, а другата против Љупчо Ристовски од Интегра.
Основниот граѓански суд Скопје пресуди во корист на Мицкоски во случајот против СДСМ, поради тоа што СДСМ на својата Фејсбук страница го нарекле „антизападен пион“ и „продолжена рака на ‘криминалецот’ Никола Груевски“.
Според судот, објава во која од СДСМ напишале „Антизападниот пион Христијан Мицкоски е продолжена рака на криминалецот Никола Груевски“, согласно членот 6 од Законот за граѓанска одговорност за клевета и навреда, претставува навреда.
Мицкоски барал симболичен надомест од едно евро.
Исто така, судот ги оценил како клевета и фејсбук објавите на СДСМ во кои пишувало дека „Мицкоски е пион кој се збогатил благодарение на неговиот шеф и ментор“, како и дека „во 2015 година, Груевски доделил на фирмата на Мицкоски ’Енерготек’ ДОО 33 000 квадрати метри државно земјиште за изградба на хидроцентрали“. Во истата пишувало и дека „Фирмата е 99% сопственост на Мицкоски, а не 7%, како што ја лаже јавноста“.
Уште една клевета, според Граѓанскиот суд, било пишувањето дека „Мицкоски му е вечен должник на Груевски. Тој мора да го штити и прави онака како што сака Груевски. Политиките на Мицкоски се политики на Никола Груевски“.
Тужбата против Љупчо Ристовски од Интегра, пак, лидерот на ВМРО-ДПМНЕ ја доби поради изјавата дека Мицкоски го продал името и бил уценет.