Францускиот претседател Емануел Макрон, кој победи на денешниот втор круг од претседателските избори, вечерва излезе меѓу своите поддржувачи и сопартијци во Париз за да ја прослави победата над противкандидатката од екстремната десница, Марин Ле Пен. Пред да се качи на говорницата и да одржи победнички говор, на настанот кој се пренесува во живо на неговиот Фејсбук профил, се слушаа звуците на европската химна „Ода на радоста“, како прилог на триумфот дека неговата победа ќе ја зацврсти Европа, наспроти политиките за кои се залагаше Ле Пен.
Според проекциите што ги објавија Француската телевизија и Радио Франција, Макрон на денешното гласање освои 58,8 проценти од гласовите, додека противкандидатката Ле Пен освои 41,2 проценти. Забележана е и висока апстиненција од 28 проценти, што доколку се потврди во конечниот резултат, тоа ќе биде највисока апстиненција на гласачи во втор круг на претседателски избори во Франција, по 1969 година.