Лидерот на СИРИЗА Алексис Ципрас, за време на вчерашните партиски избори, беше реизбран за претседател на партијата, јави дописничката на МИА од Атина.
Ципрас немаше противкандидат, а по завршувањето на гласањето, кое поради големиот интерес беше продолжено за еден час, лидерот на опозициската партија се осврна на масовното учество во процесот, посочи дека биле вклучени над 110.000 нови членови и дека е направен „голем, значаен и решителен чекор за одново да се врати надежта во земјата”.
„СИРИЗА, со 30.000 членови, во минатото победи во три круга избори. СИРИЗА, со 172.000 членови денес, сигурно ќе биде првата партија со разлика на следните избори, тогаш кога господинот Мицотакис ќе реши да распише избори“, рече Ципрас.
Тој додаде дека СИРИЗА стана „најмасовната партија со активни членови во Грција и една од најмасовните партии на левицата во цела Европа”, што според него е „исклучително важен успех”.