На средбата меѓу македонскиот премиер Димитар Ковачевски и бугарскиот премиер Кирил Петков во предвечерието на одбележувањето на 24-ти мај и браќата Св. Кирил и Методиј имаше најави дека токму денес двете страни ќе објават напредок во преговорите за кревање на бугарското вето. Но засега од Рим ништо ново.
„Во овој момент не можам да кажам за тоа дали има напредок во однос на постигнување на заемно прифатлив документ со Бугарија, но разговорите продолжуваат меѓу експертските тимови на министерствата за надворешни работи и штом ќе има одреден напредок тогаш ќе биде соопштен на ниво на министри“, вели Ковачевски.
Според Ковачевски, договорено е тие разговори да продолжат со цел да се обидат министерствата за надворешни работи да дојдат до документ што би бил прифатлив за двете држави и би претставувал основа за решение кое ќе може да биде споделено со институциите во двете држави.
– Воопшто не разговаравме и за тоа дали има нови услови од Бугарија. Се работи на оние прашања кои беа отворени и претходно, за нив веќе постои т.н. португалски предлог, кој што уште е основа за разговори помеѓу министерствата за надворешни работи и во овој момент не можам да кажам за напредок во однос на постигнување на заемно прифатлив документ, со оглед на тоа што додека не се дојде до таков документ не можеме да зборуваме за напредок, рече Ковачевски.
Бугарскиот премиер Кирил Петков од Рим испрати порака дека нема самостојно да носи одлука за Македонија туку тоа мора да биде со широк консензус. Истовремено тој побара од претседателот Радев да го свика Советот за национална сигурност.
„Важно е да имаме конструктивен дијалог и тој да продолжи, да не потклекнуваме на провокации од различни групи кои не сакаат напредок и само на таков начин може да градиме добрососедски односи кои ги сакаат и двете страни“, додаде Петков.