Случајот со плацовите за ЕВН според СДСМ, водел кон ВМРО – ДПМНЕ и се сомневаат дека со парите кои ги добиле осомничените, се финансирала и партијата. ВМРО ДПМНЕ ги отфрла ваквите обвинувања и бара секој кој се огрешил пред законот, да одговара.
„Еден од осомнитечните е телохранител на Мицкоски, извесен Влатко Илиевски, со Договор вреден неверојатни 500.000 евра или половина милион евра. Јавно достапните информации во медиумите покажуваат дека на крајно сомнителен начин продал парцели од речиси 40.000 метри квадратни. Но, тој не ги купил туку ги добил на подарок. Осомничен за кривично дело „измама во службата“ е и Игор Гиевски, поранешен претседател на УМС на ВМРО-ДПМНЕ. Понатаму, осомничен е и Мирослав Митовски, син на екс-градоначалник од ВМРО-ДПМНЕ во Ѓорче Петров“, изјави Дарко Каевски, пратеник и портпарол на СДСМ.
Лидерот на партијата ВМРО-ДПМНЕ Христијан Мицкоски вели дека со овие провокации се обидуваат да ја дефокусираат јавноста од девијантното однесување во Парламентот и инфлацијата
„Да бидеме јасни и прецизни, јас верувам во пресумпција на невиност, но исто така секој оној кој се огрешил пред законот, родена сестра и брат да ми е, ќе одговара. Времето на неказниви поединци во општеството, заврши“, рече Христијан Мицкоски, претседател на ВМРО – ДПМНЕ.