Инфлацијата во нашата земја во април достигнала 10,5 отсто, а Народна банка преку своите инструменти почнала со постепена нормализација на монетарната политика, вели гувернерката Анита Ангеловска – Бежоска.
Зборувајќи за инфлациските движења и проекции таа рече дека во Централна и Југоисточна Европа инфлацијата во тој период била 11,4 отсто.
„Инфлацијата е зголемена и во домашната економија и изнесувала 10,5 отсто во април, со оглед на исклучително високата трговска отвореност на земјата, што значи голем број продукти коишто ги користиме се од увоз“, посочи гувернерката Бежоска во својот говор на Годишната меѓународна конференција „Одржување на растот во време на неизвесност и потоа“.
„Со оглед на зголемените инфлациски очекувања и состојбата на девизниот пазар, Народната банка исто така започна со постепена нормализација на монетарната политика преку користење повеќе инструменти. Секој чекор во натамошниот период ќе зависи од макроекономските услови и очекувања и согледувањата на ризикот“, вели таа.
Бежоска истакна дека координацијата помеѓу монетарната и фискалната политика е од особено значење за пребродување на новите предизвици коишто ги донесе војната во Украина.
„За време на пандемијата, силната реакција и добрата координација на монетарната и фискалната политика придонесле за релативно брзо закрепнување од кризата. Сепак, во оваа криза, со оглед на инфлациските движења, ситуацијата е поразлична и вниманието на централните банки треба да биде насочено кон одржување на стабилноста. Неопходно е ублажувањето на ефектите врз економијата на краток рок да се прави преку фискалните инструменти што ги засегаат најприоритетните области и најпогодените категории на населението“, рече гувернерката.