Украинскиот тинејџер Андриј Покраса лоцирал колона возила на руската армија која се приближувала од запад во полето зад неговата куќа.
Тоа се случило кон крајот на февруари, кога руската армија напредувала кон Киев. Украинските одбранбени сили им дале задача на цивилот и на операторот со беспилотни летала да ја пронајдат колоната возила. А токму тоа го направил 15-годишниот Андриј.
Според MSN, неговиот идентитет и улогата што ја одиграл во војната ги потврдиле шефот на украинската федерација на сопственици на дронови, командантот на вооружените сили на Украина и неговите родители. Командантот Јуриј Касјанов вели дека тинејџерот бил единствениот со искуство во управување со беспилотни летала во областа.
„Тој е вистински херој на Украина“, изјави командантот за Глобал њуз. Андриј вели дека ова искуство му било крајно застрашувачко, но дека не сакал руските војници да го заземат неговиот град.
Одбранбените сили се свртеле кон него бидејќи требало да ги дознаат ГПС координатите на колоната возила на руската армија, рече Андриј. Му дале информации каде требало да бидат Русите, а целта на тинејџерот била да ги најде точните координати и да им ги даде тие информации на украинските војници.
„Успеавме да ја најдеме колоната затоа што на еден камион долго време му беа вклучени светлата. Тие ја таргетираа локацијата откако им ги дадов координатите и фотографиите“, рече Андриј. Тој додава дека неговите чувства биле измешани, бидејќи луѓето на крајот загинале. Со негова помош Украинците успешно ја уништиле колоната. „Бев среќен, но луѓето гинеа. Тие беа окупатори, но сепак луѓе“, вели младиот Украинец.
За време на војната во Украина, комерцијалните беспилотни летала станаа важна алатка, па стотици цивили успешно ги користеа дроновите за снимање на движењата на руските сили, како и потенцијалните воени злосторства. Податоците подоцна биле проследени до украинските власти или објавени на Интернет. Командантот вели дека многу млади Украинци се премногу млади за да им се приклучат на вооружените сили, но дека придонеле за управување со беспилотните летала, пишува МСН.
„Тие помогнаа не само во тоа, туку и со пренесување на информациите собрани со набљудување руски војници и возила. Тие се сметаат себеси за слободни луѓе во слободна земја и затоа сакаа да бидат дел од неа“, рече тој.