Пратеникот Скендер Реџепи треба да го врати мандатот кој го добил во име на партијата, велат од партијата Алтернатива, објави Канал 5.
Пратеникот Скендер Реџепи изјави дека од сега ќе дејствува како независен пратеник во Собранието на Македонија. Од партијата Алтернатива велат дека оваа одлука е исклучиво лична и не станува збор за став кој е поврзан за партиска структура или партиски орган на Алтернатива.
Алтернатива изрази и жалење за одлуката на пратеникот Реџепи и ја известува јавноста дека тоа нема да влијае на групата на пратениците на Алтернатива, ниту на парламентарното мнозинство, ниту на учеството на Алтернатива во извршната власт.
„Меѓутоа е индикативно неговото повлекување во моментот кога македонската опозиција организира протести против парламентарното мнозинство“, додаваат оттаму.
Бидејќи мандатите на овој парламентарен состав, следствено и на Алтернатива, се добиени под логото и во име на партијата, а не како независни кандидатури,од партијата се надеваат дека пратеникот Реџепи во име на политичкиот морал и должностите кон партиските структури од кои станал пратеник ќе го врати добиениот мандат во име на партијата.