Францускиот предлог за РС Македонија е исклучително добар затоа што ги адресира сите очекувања на Бугарија, изјави Христо Иванов, копретседател на владејачката „Демократска Бугарија“ (ДБ) во емисија на бугарската Нова ТВ.
– Францускиот предлог за Република Северна Македонија е исклучително добар за Бугарија. Би било национално предавство доколку не го разгледаме предлогот поради внатрешно политички скандали – рече Иванов.
Според него, предлогот е многу добар за Бугарија бидејќи ги адресира, решава и ги исполнува сите нивни очекувања.
– Така, на најважната тема, промената на Уставот, Северна Македонија мора да се обврзе пред Европската унија да го смени и да ги регистрира Бугарите како еден од народите што ја изградиле државата, а ако тоа не го направи, нема да има преговори – рече тој.
Според Иванов, во документите се користат термините „малцинства“ и „заедници“. Тој ја опиша тезата на Слави Трифонов како „апсолутна национална неодговорност“.
– Со овој документ се решаваат сите прашања што ги побара Бугарија – коментира Иванов.
Тој потсети дека Советот за национална безбедност под претседателот Румен Радев се согласил дека Бугарија сака Северна Македонија и Албанија да започнат разговори.
За Слави Трифонов од Има таков народ (ИТН) чие напуштање на владејачката коалиција ја втурна Бугарија во политичка криза, Иванов вели дека се обидува да ја користи темата за Северна Македонија за да си обезбеди алиби за некои негови внатрешно-политички дејствувања и порачува дека тоа е неодговорно.
Лидерот на ИТН, пак, вчера го критикуваше францускиот предлог со забелешки дека во него се споменува „малцинство“, а тој смета дека во Северна Македонија нема бугарско малцинство туку има Бугари. Исто така, имаше и забелешки зошто во предлогот се користи македонски јазик бидејќи, според него, таков не постои.