Јужноафриканската полиција ја истражува смртта на најмалку 20 луѓе во ноќен клуб во крајбрежниот град Источен Лондон.
Нејасно е што довело до смртта на младите кои наводно присуствувале на забава за да го прослават крајот на зимските училишни испити. Полицискиот бригадир, Тембинкоси Кинана, изјавил дека жртвите биле на возраст од 18 до 20 години.
Локалниот весник Daily Dispatch објави дека телата биле расфрлани по маси и столови без видливи знаци на повреди.
„Во овој момент не можеме да ја потврдиме причината за смртта“, рече портпаролот на Министерството за здравство Сијанда Манана.
„Ќе извршиме обдукција што е можно поскоро за да се утврди веројатната причина за смртта. Починатите се пренесени во државната мртовечница“, додаде Манана.
Полицискиот министер Беки Целе се очекуваше да го посети местото на настанот.
Сопственикот на клубот, Сијахангела Ндеву, изјави за локалната телевизија eNCA дека бил повикан на местото на настанот.
„Сè уште не сум сигурен што навистина се случило, но кога ме повикаа утрото ми рекоа дека местото е преполно и дека некои луѓе се обидуваат насилно да влезат во таверната“, рече тој.
„Сепак, ќе слушнеме што вели полицијата за причината за смртта“, додаде Ндеву.