Тројца полициски службеници се повредени, а пет лица се приведени за време на вчерашниот јавен собир на подрачјето на СВР Скопје, кој се одржа во периодот од 19.00 часот пред Владата на Република Северна Македонија, продолжи пред Министерството за надворешни работи и заврши пред Собранието на Република Северна Македонија околу 22.30 часот. Двајца од полициските службеници се здобија со повреди при инцидент во близина на споменикот Скендербег, каде со брза реакција на полицијата беше избегнат поголем инцидент, при што веднаш беше приведен Е.Ј.(40) од Скопје, осомничен за пукање од пиштол. Пиштолот е обезбеден, за случајот е известен Јавен обвинител и по негово документирање против лицето ќе биде поднесен соодветен поднесок.
Уште три лица се лишени од слобода поради фрлање со тврди предмети кон полициски службеници. Еден полициски службеник беше повреден со тврди предмети пред Собранието на РСМ и е задржан на болничко лекување. Уште едно лице е приведено пред угостителски објект на подрачјето на Центар, поради снимање со дрон без дозвола.
За време на собирот пред Собранието регистриран е и настан во кој учесници во протестот се обидувале да отстранат група на маскирани лица, кои предизвикувале инциденти.
Во текот на вчерашното деноноќие лишено е од слобода и лицето кое на 05.07.2022 фрли молотов коктел кон зградата на Собранието. Станува збор за Ј.С.(18) од Скопје, кој беше идентификуван од снимката и го призна делото. По документирање на случајот и против него ќе следува соодветна пријава, информираат од МВР.
Министерот за внатрешни работи Оливер Спасовски денеска по проследувањето на делот од физичките проверки во процесот на селекција на пријавените лица за полициски службеници по последниот објавен јавен оглас во изјава за медиумите апелираше протестите да бидат мирни и потврди дека на вчерашниот настан имало доволен број на полициски службеници.
-Полицијата го спречи инцидентот, и тоа поголем број на полициски службеници. Погледнете ги видеата кои беа објавени од медиумите и од нас. Еве само една слика ќе ви покажам, зар ова не е некој што интервенира на лице место? Не треба да дојде до ова секако, и за да не дојде до ова секој еден граѓанин треба да знае дека мирни протести мора да бидат. На никого не му е дозволено да вади огнено оружје, немојте да оправдувате вадење на огнено оружје, можеше да дојде до поголеми последици, рече Спасовски.
Спасовски апелираше и до граѓаните и до политичките субјекти и сите кои учествуваат на протестите да бидат на мирни протести.
-Вандализмот и насилството нема да даде резултати во никој случај, рече Спасовски.
Спасовски потенцираше дека имало доволно полициски службеници кои не дозволиле да дојде инцидент од поголеми размери.
Министерот изјави и дека е уапсено лицето што фрли молотов коктел на Собранието, и дека детали ќе се објават откога ќе се извршат потребните разговори. (Р.Н.)