Рускиот министер за надворешни работи, Сергеј Лавров, во дипломатска офанзива во Египет, ги отфрли тврдењата дека Москва ја предизвикала глобалната криза со храна.
Во говорот пред амбасадорите на Арапската лига во Каиро, тој рече дека западните земји ја искривуваат вистината за влијанието на санкциите врз глобалната безбедност на храната.
Тој ги обвини западните земји дека се обидуваат да ја наметнат својата доминација над другите.
Голем дел од арапскиот свет и Африка се тешко погодени од недостигот на жито предизвикан од руската војна во Украина.
Договорот склучен дури оваа недела за обновување на извозот на жито од Украина виси на конец откако Русија вчера го бомбардираше пристаништето Одеса.
Лавров ќе посети три африкански држави за да собере поддршка за Москва.
Лавров рече дека „агресивноста“ на западните нации во воведувањето санкции кон Русија укажува на еден едноставен заклучок: „Не се работи за Украина, туку за иднината на светскиот поредок“.
„Тие велат дека сите мора да поддржат светски поредок заснован на правила, а правилата се напишани во зависност од тоа каква конкретна ситуација Западот сака да реши во своја полза“, рече Лавров.
По средбата со министерот за надворешни работи на Египет Самех Шукри, Лавров на заедничка прес-конференција рече дека Западот го продолжува конфликтот иако му е јасно „каков ќе биде крајот“.
Во статијата што ја напиша во локален медиум, Лавров ги отфрли обвинувањата дека Русија „извезува глад“ и ја обвини западната пропаганда.
Тој додаде дека западните санкции наметнати на Русија ги влошиле „негативните тенденции“ на меѓународниот пазар на храна што ги предизвика пандемијата на коронавирус.
Сергеј Лавров се обидува да ги убеди африканските земји дека е подобро да застанат на страната на Русија отколку на Западот – користејќи фрази како „ние ќе ви помогнеме да го завршите процесот на деколонизација“.
Но, во поголемиот дел од африканскиот континент е јасно дека постои неподготвеност да се заземе страна во врска со војната во Украина. Студената војна имаше разорно влијание, поттикна конфликти во Африка и го запре развојот.
Во моментов, најголема загриженост е галопирачката цена на храна и гориво. Повеќе од 40 отсто од африканската пченица доаѓа од Русија и Украина. (Од новинските агенции)