Компанијата која требало да обезбеди природен гас за земјава по поефтина цена, за која опозицискиот лидер Христијан Мицкоски во неколку наврати зборуваше на прес-конференција била извесната ПГО со седиште во Швајцарија, се дознава од извори кои учествувале на состанок со претставници на компанијата.
Од компаниите кои што ги посочил лидерот на ВМРО-ДПМНЕ, Христијан Мицкоски, како негови контакти кои што можат да помогнат во надминување на енергетската криза, односно за снабдување на природен гас и мазут, до денеска нема никаков одговор велат изворите иако во изминатиот период бил остварен контакт со посочените фирми, но ниту во Министерството за економија, ниту во ЕСМ, немаат добиено каква конкретна понуда освен општ предлог договор во кој не стои ниту една од клаузулите кои се вообичаени за енергетски договори.
Според порталот Независен, во регистерот на компании во Швајцарија, компанија со ваков назив е регистрирана во кантонот Цирих, каде што стои дека нејзина дејност е трговија со нафта и нафтени деривати.
Познавачите на приликите кај нас, пак, велат дека таа компанија не е непозната во овдешните кругови, бидејќи и во минатите години се нудела за снабдување со енергенти, информира порталот.
Инаку, на состанокот во Белград од македонска страна биле министерот за економија Крешник Бектеши и директорот на ЕСМ, Васко Ковачевски, како и советникот за енергетика во Владата, Васко Андонов. Од страна на ПГО присуствувале двајца претставници, едниот државјанин на Република Србија, а другиот на Босна и Херцеговина, кои што имале фирма регистрирано во Швајцарија и кои што информирале дека може да се обиде да обезбеди руски гас.
На состанокот, како што велат извори од Владата, било презентирано кои се условите согласно нашиот закон, банкарски гаранции, количества, место на испорака, како и дека било која фирма треба да достави понуда до ЕСМ како компанија задолжена за купување енергенти.
„До ден денешен, таква понуда не е доставена. Ниту за гас, ниту за мазут, ниту за било што друго“, велат извори во Владата.
Од ЕСМ велат дека до сега со посочената компанија немале ниту контактни, ниту било каква соработка и дека фирма со такво име не им била позната.
На средбата од страна на претставниците на ПГО бил доставен договор за соработка, кој што не предвидувал права и обврски и во кој што не биле посочени количествата кои што ЕСМ ги побарува за периодот од ноември годинава до 30 април, ниту пак, била презентирана било каква цена.
„Доставија стандарден предлог договор за соработка, во кој што се ставаат само генералии“, велат соговорници од компанијата. „Сѐ уште немаме добиено потврда дали количествата кои што ги побаравме, месечни и шестмесечни, односно за целиот период, околу 230 милиони нормални метри кубни, можат да ги испорачаат, како прво, и како второ, да дадат цена и дали таа цена ќе биде фиксна или варијабилна“, додаваат соговорниците.
Тие прецизираат дека дури по добивањето на таквата понуда ќе може да се разговара во компанијата, на ниво на управен и надзорен одбор, како и да се побара мислење од Владата.
Што се однесува до мазутот, сѐ уште нема никаков контакт од фирмата ниту пак има било каков документ, велат истите извори, кои додаваат дека на средбата бил претставник од компанија од Босна и Херцеговина, поточно од Република Српска.
Во меѓувреме, како што посочуваат од ЕСМ, се следи процесот на испорака на природен гас, пред се количествата за ноември, а потоа и за следните месеци.
„Денеска имавме разговор со домашната компанија ‘Макпетрол’, очекуваме во текот на утрешниот ден да достават понуда. Но, исто така чекаме две до три компании кои исто така се понудија дека можат да обезбедат природен гас, две се обратија директно до ЕСМ и една до Министерството за економија“, велат соговорниците.
Од ЕСМ додаваат дека во текот на оваа недела може да се очекува нешто поконкретно околу снабдувањето со природен гас, односно да се обезбеди гасот за работа на топланите, но и за можно вклучување на процесот на работа на ТЕ-ТО, која се уште нема обезбедено гас за работа. Оваа когенеративна централа во овој период не работи и неизвесно е дали ќе работи и во наредниот период.