Германија се подготвува да воведе ограничување на цената на електричната енергија и за домаќинствата и за индустриските потрошувачи како дел од нејзиниот последен обид да се справи со енергетската криза, објави Ројтерс, цитирајќи нацрт документ на германската влада.
Според извештајот, цената на електричната енергија ќе биде ограничена на 13 евроценти за киловат час за индустриските потрошувачи за 70 отсто од минатогодишната потрошувачка, додека домаќинствата ќе имаат плафон од 40 евроценти за киловат час за 80 отсто користење.
Регулативата треба да стапи во сила од 1 јануари.
Веста уследи по сличната нацрт-регулатива за цените на гасот. Како што објави Ројтерс, германската комисија за гас претстави конечен предлог за ограничување на трошоците на 12 евроценти за киловат-час за 80 отсто од стандардната потрошувачка на домаќинствата и тоа од март 2023 година до крајот на април 2024 година најрано. Ќе бидат ограничени и цените за индустриските потрошувачи – до 7 евроценти за киловат-час. Промените ќе стапат на сила во февруари. Берлин, како што се најавува, ќе донесе дополнителни одлуки за нацрт-регулативата подоцна оваа недела.
Едностраните мерки на Берлин за справување со енергетската криза, почнувајќи со пакетот за спас од 200 милијарди евра, објавен минатиот месец од канцеларот Олаф Шолц, не беа поздравени од остатокот од ЕУ, која повика на поунифициран пристап.