Владата на денешната седница одлучи да го продолжи субвенционирањето на сметките за парно греење на домаќинствата на подрачјето на град Скопје. Според одлуката, оваа мерка ќе важи се до истекот на кризната состојба во снабдувањето со топлинска енергија.
Оваа одлука, велат од Владата има за цел заштита на домаќинствата од повисока цена на топлинска енергија.
„Мерката за финансиската поддршка е предвидено да се реализира согласно меѓусебните права и обврски утврдени со склучени договори помеѓу акционерското друштво за производство на електрична енергија – ЕСМ, во државна сопственост, Скопје и носителите на лиценца за снабдување со топлинска енергија на подрачјето на градот Скопје“, велат од Владата.
Во Скопје околу 60 илјади домаќинства се приклучени на системот за централно греење на кој грејната сезона трае од 15 октомври до 30 април.