В.д. претседателот на Алијансата за Албанците (АА) Арбен Таравари денеска изјави дека во моментов нема преговори на неговата партија да стане дел од Владата. Сепак, неговата партија, како што рече Таравари, ќе ги поддржи уставните измени и како опозиција со цел да бидат Бугарите дел од Уставот.
„Нема преговори, ако има ќе излеземе пред вас и ќе кажеме се што има. Ние ќе ги поддржиме уставните промени за вметнување на бугарскиот етникум во Македонија во Преамбулата, без разлика дали ќе бидеме дел од Владата или ќе бидеме опозиција“, изјави денес Таравари.
Тој додаде дека вршат комплетна реорганизација на партијата. „Ќе бидеме конструктивна опозиција, нема ништо да смениме во политиката, рече тој пред партиското седиште каде денеска ја поднесе кандидатура за претседател на партијата.
Новинарите побараа коментар од Таравари за изјавата на претставник на партијата Алтернатива дека Алијанса за Албанците ќе биде „резервна гума” на ДУИ ако биде дел од Владата.
„Ние не сме резервна гума на ДУИ. Некој е во Владата таму гума, само не би сакал да коментирам понатаму“, рече Таравари.
На прашањето дали ќе ги поддржат уставните измени и воедно дали ќе инсистираат да се тргне одредницата 20 отсто за албанскиот јазик, Таравари одговори дека се надева на почит од останатите партии по тоа прашање.
„Нашата идеја била и продолжува да биде дека треба да се тргне тоа и да се стави албански јазик. Ние очекуваме македонските партии да покажат почит спрема нас. И тоа да го спроведеме и тоа да биде дел од Уставот. Ја мислам дека 20 проценти ќе помине и сум оптимист и очекувам почит пред се од македонските партии, официјалниот јазик да не се нарекува јазик на 20 посто туку албански јазик. Се надевам дека ќе помине тоа“, посочи Таравари.
Тој денеска поднесе кандидатура за претседател на партијата. Вели дека е можно да има противкандидати со оглед дека утре е крајниот рок за доставување кандидатури, две недели пред одржување на партискиот конгрес.
Таравари рече дека вчера почнал со собирање поптиси и, според информациите што ги има, веќе се собрани околу 2 000, а потребни се 400.
Тој потврди и дека АА не договара, ниту нешто договорила со Владата.
Според него, тенденцијата на Алијанса е на следните избори да ја направи долгоочекуваната промена кај албанскот блок.
„Нашите тенденции се следните избори да ја направиме долгоочекуваната промена кај албанскот блок. Албанците во земјава заслужуваат по 20-годишно владеење некој да ја смени ДУИ, а никој друг освен Алијанса за Албанците нема капацитет тоа да го направи. Се надевам дека ќе го постигнеме тоа“, истакна Таравари. „Алијанса е столбот на опозиционерството на албанските партии, и по рејтинзи и по сите анализи стоиме убедливо најдобро и се надевам дека ние ќе бидеме тие што ќе ја донесат таа промена“.