Британскиот премиер Риши Сунак најави соработка меѓу Велика Британија, Италија и Јапонија за развој на нов борбен авион кој користи вештачка интелигенција. Премиерот вели дека заедничкото вложување има за цел да создаде илјадници работни места во Велика Британија и да ги зајакне безбедносните врски.
Трите држави ќе развијат ловец од следната генерација – кој треба да стапи во употреба во средината на 2030-тите – и ќе го замени авионот Тајфун.
Сунак рече дека партнерството „ќе ја чува земјата безбедна од новите закани со кои се соочуваме“, денеска при посетата на базата на Кралската воена авијација. „Ние сме една од ретките земји во светот што има способност да изгради технолошки напредни борбени авиони“, изјави тој.
Работата на развивањето на новото борбено летало е веќе во тек – со цел да се создаде борбен авион кој ќе се движи со молскавична брзина, ќе користи напредни сензори, па дури и вештачка интелигенција за да му помага на пилотот кога е преоптоварен или е под екстремен стрес.
Авионот може да лета и без пилот доколку е потребно, и може да истрела хиперсонични проектили.
Но, изградбата на таков комплексен авион е исклучително скапа – развојот на авионот F-35 беше најскапата програма што некогаш ја презел Пентагон – така што Британија бара партнери.
Италија веќе се приклучи, а додавањето на Јапонија е значаен потег – во време кога Британија гради поблиски врски со сојузниците во индо-пацифичкиот регион, загрижена за влијанието на Кина.
Други земји сепак би можеле да се приклучат на програмата. Франција, Германија и Шпанија веќе работат заедно на свој посебен дизајн – како и САД.
За Обединетото Кралство овој проект не се однесува само на безбедноста, туку и на економијата. „Се надеваме дека развојот на нов борбен авион може да создаде и одржи илјадници работни места во Велика Британија и да ги отвори вратите за поголем извоз на оружје“, вели премиерот Сунак.
Извор: Би-Би-Си