Најбогатиот во регионот е Дубравко Гргиќ од хрватската „Аграм груп“, чија вредност е проценета на 2,8 милијарди евра, објави српски„Неделник“ кој се занимаваше со вредноста на компаниите и нивните сопственици во регионот.
По него следуваат Миодраг Костиќ „МК Груп“ и Мирослав Мишковиќ „Делта холдинг“ од Србија со по 2,7 милијарди евра, а следни се Силвио и Роберт Кутиќ и Изабел Јелениќ од „Инфобип“ во Хрватска, чија вредност е проценета на 2,5 милијарди евра.
На листата се проценува дека 18 компании вредат повеќе од една милијарда евра, а меѓу нив најсвежо лице е Мате Римац од познатиот автомобилски „Римац груп“, кој е на петтото место со 2,2 милијарди.
По него е Емил Тедески, сопственик на Атлантик Група (1,6 милијарди), Петар Матијевиќ, сопственик на МИ „Матијевиќ“ (1,5 милијарди). Дејан Чакајац и Јадранка Степановиќ (Моцарт, 1,3 милијарди) се на осмото место, додека Драган Шолак (Јунајтед Груп, 1,3 милијарди) е на деветтото место.
Топ десет ја заклучува Миле Ќурковиќ (Плодин 1,3 милијарди).
„Неделник“ објаснува дека листата ја составиле експерти од две консултантски фирми кои работат на Њујоршката берза. Списокот не покажува колку пари имаат бизнисмените, туку колку вредат нивните компании и колку пари потенцијално би можеле да добијат доколку ги продадат.
Меѓу попознатите имиња на листата се Богољуб Кариќ на 21. место со 940 милиони евра, Вук Хамовиќ на 26. место со 800 милиони евра, Жељко Митровиќ на 32. место со 732 милиони евра и Новак Ѓоковиќ на 61. место со 430 милиони евра.
„Неделник“ наведува дека списокот покажува и дека важи старата југословенска поделба на развиени и неразвиени, бидејќи економиите на Црна Гора, БиХ и Северна Македонија се далеку зад Хрватска, Словенија и Србија.
Исто така, нееднаквоста е најголема во Црна Гора бидејќи имотот на петте најголеми во Црна Гора изнесува 1,7 милијарди евра, што е дури 35,4 отсто од бруто домашниот производ (БДП).
Следната најголема нееднаквост е во Северна Македонија, каде што средствата на петте најголеми изнесуваат 23,9 отсто од БДП.
Извор: Цивил Медиа