Со обработени 86,85% од гласачките места во 49-ото бугарско Собрание влегуваат шест партии, јави утринава БГНЕС. Притоа за коалицијата ГЕРБ на Бојко Борисов и коалицијата со СДС гласале 567.208 лица или 26,59 отсто, а за коалицијата на Кирил Петков Продолжуваме со промените и ДБ гласале 523.425 лица или 24,54 отсто.
Околу 14,5 посто од гласовите одат за партијата Возобновување, 13 посто за Движењето за права и слобода, 9 посто за Социјалистичката партија и нешто над 4 посто за Има таков народ.
Првите прогнози се дека овој распоред на силите тешко ќе гарантира стабилна влада, дека без оглед на остварената предност поранешниот премиер Бојко Борисов нема лесно да најде коалициски партнери и дека и покрај коалицискиот капацитет на партијата на екс премиерот Кирил Петков, и да формира влада ќе доживее силни блокади од моќната ГЕРБ.
Крајниот рок за објавување на конечните изборни резултати е 6 април. Имињата на пратениците во следното Народно собрание се очекува да бидат објавени до 9 април.