Министерот за правда Кренар Лога во рамките на дводневната работна посета на Хаг ја потпиша Хашката конвенција за признавање и извршување на странски пресуди во граѓански и трговски предмети од 2 јули 2019 година. Конвенцијата беше потпишана во присуство на генералниот секретар на Хашката конференција за меѓународно приватно право, Кристоф Бернанскони и амбасадорката Бети Јачева како и другите присутни.
Се смета дека потпишувањето на Конвенцијата ќе влијае на подобрување на деловната средина и работењето на компаниите, подобрување на прекуграничната соработка во граѓанската и трговската материја, како и повисок степен на усогласеност на националното со европското законодавството како земја-кандидат за членство во Европската Унија.
Следниот чекор во однос на Конвенцијата е спроведување на постапката за ратификација согласно Законот за склучување на ратификација и извршување на меѓународни договори.
Република Северна Македонија е член на Хашката Конференција од 1993 и досега е дел од 10 хашки конвенции. Три конвенции и Протоколот кои се потпишани во 2019 година се во постапка на ратификација.
Церемонијата на потпишување се одржа во рамките на регионалниот семинар за Хашката Конвенција за признавање и извршување на странски пресуди од 2019 година со претставници од министерствата за правда и министерствата за надворешни работи од Западен Балкан.