За жителите на Северна Кореја, нивната северна граница долго време обезбедуваше пристап до надворешни информации, можности за трговија и можности за бегство, сè до пандемијата на Ковид-19, кога таму беше изградена ограда. Кога пандемијата на коронавирус го погоди светот во 2020 година, режимот на Ким Џонг-ун презеде голем потфат да ја затвори границата со Кина и Русија, прекинувајќи ги патиштата на шверцерите и дезертерите.
Пјонгјанг оттогаш изгради стотици километри нови или подобрени огради, ѕидови и заштита, покажуваат сателитски снимки. Со ова режимот дополнително го запре протокот на информации, стоки и странски елементи во земјата, пишува Ројтерс. Исто така, и Институтот Мидлбери проучувал сателитски снимки од северната граница на Северна Кореја направени во периодот меѓу 2019 и почетокот на 2023 година.
Поради нецелосната слика, географските и временските услови, не беа достапни сите 1,4 илјади километри од границата со Кина и 18 километри со Русија. Но, новата безбедносна инфраструктура може да се види на најмалку 489 километри од границата. Тие вклучуваат бодликава жица, бетонски ѕидови, двојни огради и дополнителни штитници.
Дезертери, активисти за човекови права и извори во Кина вклучени во шверцот на луѓе и стоки тврдат дека новите бариери ги задушуваат патиштата кои биле економски спас за ранливите групи, ги прекинуваат патиштата за бегство од авторитарниот режим и дополнително го ограничуваат пристапот кон надворешните информации. Северна Кореја им нареди на стражарите да пукаат во секој што се обидува да избега, без какво било предупредување, се наведува во официјалните документи објавени од кинеските власти во 2020 година, предупредувајќи ги граѓаните на ризиците.
Во декември, американското Министерство за финансии ја санкционираше главната канцеларија за контрола на границата на Северна Кореја поради кршење на човековите права, вклучително и поставување на нагазни мини и пукање врз дезертери.
„Традиционалната рута меѓу Северна Кореја и Кина сега е практично завршена, освен ако ситуацијата не се промени“, рече Ким, јужнокорејски свештеник кој им помагал на севернокорејци да избегаат. Тој и другите што оперираат на границата зборуваа под услов на делумна или целосна анонимност, наведувајќи го стравот за нивната безбедност и желбата да ги заштитат своите мрежи.
Минатата година само 67 луѓе побегнале во Јужна Кореја, во споредба со 1.047 во 2019 година, покажуваат официјалните податоци. Бројот се намали и пред пандемијата поради зајакнатите контроли во Кина, претпочитаната дестинација на дезертерите.
Севернокорејската влада и државните медиуми не соопштуваат ништо во врска со изградбата на границата, а амбасадата во Лондон не одговори на повиците на Ројтерс. Но, официјалните тела на таа земја зборуваа за зголемена безбедност со цел во земјата да не се прошират коронавирусот и други „надворешни работи“.
Во својот говор, кога ја прогласи победата против вирусот, Ким Џонг-ун им нареди на официјалните лица да „обезбедат совршенство“ на повеќекратна блокада на „границата, линијата на фронтот, крајбрежните области, на море и во воздух“.
Дополнителното затворање на границите ќе имаат долготрајно влијание, вклучително и на растечката трговска класа во градовите каде што неформалната трговија претходно даваше можности за многу луѓе, изјави Бенџамин Кацеф Силберштајн, експерт за севернокорејската економија во американскиот Стимсон Центар.
Г. Т.