Десет лица загинаа од руски проектили што го погодија центарот на Краматорск во источно – украинскиот регион Доњецк. Меѓу загинатите се и 14-годишните сестри близначки Јулија и Ана Аксенченко.
Краматорск е под украинска контрола, но истовремено е и блиску до делови од земјата окупирани од Русија. Претседателот Володимир Зеленски рече дека Русија заслужува „само пораз и трибунал, праведни и законски судови против сите руски убијци и терористи“.
Кремљ, пак, рече дека извршува напади само врз цели поврзани со војската.
Додека спасувачките напори продолжуваат во Крамоторск, Украина наводно била погодена од друг напад од Русија. Според регионалниот шеф на Харков, тројца цивили загинале во гранатирање.
Додека продолжува спасувачката операција на местото на ракетниот напад во Краматорск, украинската полиција соопшти дека бројот на загинати се зголеми на 10, а 61 лице е ранет. Според итните служби, под урнатините се уште има жртви.
Јавниот обвинител вели дека нападите биле извршени со балистички ракети Искандер. Овие ракети со краток дострел од руско производство потешко се пресретнуваат од системите за противвоздушна одбрана поради брзината со која тие напаѓаат. Релативната близина на Краматорск со руските позиции (околу 30 километри), исто така, го прави ранлив на воздушни напади.
Меѓу загинатите има 17-годишно девојче и 14-годишните сестри близначки. Повредено е и осуммесечно бебе, иако полицијата вели дека нема закана по неговиот живот.
Украинската безбедносна служба тврди дека привела руски агент за кој велат дека бил вклучен во доставување информации за целната локација до руските сили, вклучително и колку е зафатена областа и каде се паркирани автомобилите.
Зборувајќи во украинскиот парламент, претседателот Володимир Зеленски рече дека неговата земја „никогаш нема да се согласи на која било варијанта на замрзнат конфликт“, нагласувајќи дека сите руски војници кои освојуваат мора да ја напуштат украинската територија.
Тој, исто така, ја споменува неговата формула за мир, која предвидува руски репарации за Украина за воените штети и судења на одговорните за масовните смртни случаи и уништување.
Осврнувајќи се на актуелните руски власти, Зеленски ги нарече„гангстери кои ја презедоа власта“ и сега го „тероризираат светот“. Тој додаде дека ќе завршат во Хаг, каде што е и Меѓународниот кривичен суд.
извор: Би-Би-Си
подготви: С.К.