Tокму од вмровски центри на моќ, влијателни медиуми и новинари се изнаслушавме дека „Американците се тие што го убија нашиот претседател“, што секако е надвор од реалноста, непоткрепено со никакви релевантни докази!
Почитувани,
За да се запази интегритетот и дигнитетот на медиумот во кој е напишана колумната „Руски рулет за Мицкоски“, која – со гнасни инсинуации и непотребна хистеризација – одредени медиуми и личности погрешно ја протолкуваа и пренесоа, должен сум да го дадам следново објаснување:
Мојата колумна е напишана во метафорички и слободен стил, како одговор на политиките на лидерот на опозицијата во однос на кочењето на македонските евроинтеграции. Во изминатите дваесет години, практично, од трагичната погибија на поранешниот претседател, Борис Трајковски, токму од вмровски центри на моќ, влијателни медиуми и новинари се изнаслушавме дека „Американците се тие што го убија нашиот претседател“, што секако е надвор од реалноста, непоткрепено со никакви релевантни докази.
Понатаму, истите структури, блиски до оваа политичка партија, инсинуираат дека војната во 2001 година ја „наместија Американците со што ги вадеа потоа терористите на УЧК од Арачиново“, за на крајот, истите тие да инсинуираат дека шарената револуција е спонзорирана од Американците и дека поранешниот премиер Зоран Заев ги добил „бомбите токму од нив да го сруши Груевски“.
Од тие причини, со тотално лирична хипербола, поставив хипотеза: ако толку се моќни Американците кај нас, согласно нивниот диоптер, зошто тие сметаат дека со нивната антиамериканска политика на високите интереси на САД кај нас, не би мислеле дека може да им се случи нешто такво „лошо“.
На лидерот на опозицијата, професор доктор Христијан Мицкоски му посакувам многу здравје, долг живот и успешна политичка кариера, како прв македонски политичар кој ја „поразил“ таа „штетна“ американска политика во Македонија.
Со почит,
Благојче Атанасоски
Текстот е личен став на Авторот.