Администрацијата на американскиот претседател Доналд Трамп нареди намалување на бројот на вработени во Управата за храна и лекови (ФДА) во текот на викендот со отпуштање на вработени одговорни за безбедноста на состојките на храната, медицинските помагала и други производи. Вработени по договор во ФДА добија известувања дека нивните работни места се укинуваат, според неименувани претставници на таа агенција.
Вкупниот број на укинати работни места не е точно познат, но според американски медиуми, отпуштањата се насочени кон вработени во центрите за храна, медицински помагала и тутунски производи – што вклучува надзор врз е-цигарите.
Американското Министерство за здравство во петокот објави дека планира да отпушти 5.200 вработени по договор, вклучително и од Националниот институт за здравје, Центрите за контрола и превенција на болести и ФДА.