ЦИВИЛ – Центар за слобода, во партнерство со Медиа Дијалог (Media Dialogue) и Младите за медиумите (Youth4Media) од Германија, и меѓународната организација Нов европски граѓански форум со седиште во Брисел, најавува промоција на публикацијата „Одбрана на демократијата и човековите права – извештај и препораки“. Публикацијата е на англиски јазик и опфаќа обемен документ за политики, со препораки и стратешки насоки за борба против дезинформациите и хибридните закани, јакнење на демократските институции, граѓанското општество и медиумите, и решително сопирање на авторитаризмот, воените агресии и ултрадесничарските тенденции.
Понатаму, публикацијата содржи опсежна транскрипција од конференцијата на 12 декември на која учествуваа околу 30 говорници од десетина европски држави и од САД. Во публикацијата е поместен и дел со извештај за активностите што произлегоа од работата на проектот „Одбрана на демократијата и човековите права“, фотографии и линкови до онлајн ресурси на организациите, носители на проектот. Овој проект го финансира владата на германската покраина Северна Рајна-Вестфалија, со која партнерските организации имаат долгогодишна соработка.
Публикацијата чие објавување се очекува идната недела, ќе биде претставена на сите значајни меѓународни настани оваа година и ќе биде доставена до сите носители на одлуки, значајни граѓански и тинк-тенк организации и медиуми во светот.
Силно и видливо беше присуството на ЦИВИЛ на меѓународната сцена во изминатиот период. ЦИВИЛ беше домаќин на голем меѓународен настан, конференцијата „Одбрана на демократијата и човековите права“ што се одржа во Скопје, на 11 и 12 декември. Веднаш по конференцијата беше формирана и Иницијативата за одбрана на демократијата која има глобален карактер.
На 4 март, ЦИВИЛ беше домаќин на уште една меѓународна конференција „Украина и светот: Отпор против агресијата, победа над авторитаризмот“ на која, освен од Северна Македонија, учествуваа 16 говорници од Украина, Германија, Велика Британија, Франција, Полска, САД и други земји.
Стратегијата на ЦИВИЛ, усвоена на свеченото собрание на организацијата по повод 25-годишнината од основањето во ноември, 2024 година, вклучува голем број иницијативи за прекугранична и меѓународна соработка. Во тој дух, ЦИВИЛ во изминатите четири месеци организира дури две меѓународни конференции, а во тек се и активности и проекти на регионално ниво.
Регионалните и меѓународните активности на ЦИВИЛ ќе се засилат уште повеќе во текот на наредните месеци.
ЦИВИЛ