Свеченото отворање на Деновите на словенечката култура во Скопје беше крунисано со концертот на словенечката етно рок група „Dupljak Village Orchestra“ од Радече под раководство на Алеш Брезникар, кој на македонската јазност е познат по организацијата на традиционалната туристичко-културна манифестација „Словенија на Охрид“.
Свето Стаменов
Во рамките на шестото издание на Скопскиот градски фестивал на агенцијата Bagi Communications, од 13 до 17 овој месец во Скопје беа одржани Деновите на словенечката култура. Коорганизатори на манифестацијата, на чие свечено отворање поздравно обраќање имаше амбасадорот на Република Словенија во нашава земја Грегор Пескар, беа словенечката амбасада во Скопје и словенечкото културно друштво „Франце Прешерн“, со поддршка на град Скопје, Министерството за култура и туризам на Република Северна Македонија и министерствата за надворешни и европски работи и за Словениците низ светот на Република Словенија, како и повеќе претпријатија.
Деновите на словенечката култура беа отворени на 13-ти овој месец во Музејот на град Скопје со промоцијата на македонското издание на стихозбирката „Се отвори небото: Поезија за Магда“ проф. д-р Милан Јазбец, амбасадор на Република Словенија во Македонија од 2016 до 2020 година, универзитетски професор, писател и поет, кој на македонски јазик досега има објавено десетина книжевни дела (романи и збирки поезија), како и на јазиците кои се запишани во македонскиот устав (албански, турски, српски, ромски, влашки и босански). Книгата ја претстави проф. д-р Лидија Аризановска, редовен професор на Филолошкиот факултет „Блаже Конески“ – Скопје, која се осврна и на целокупното книжевно творештво на проф. д-р Милан Јазбец, кое веќе ја достигна бројката од 91 објавена книга. За амбасадорските години во Скопје и за публициската дејност на амбасадорот Милан Јазбец, пак, говореше Свето Стаменов, политиколог, новинар и истакнат македонски публицист, кој посебно се осврна на шесте публицистички дела на проф. д-р Јазбец објавени на македонски јазик во последните неколку години.
На промоцијата проф. д-р Јазбец ги најави своите наредни изданија, меѓу кои и македонските изданија – двотомната „Искра Чоловиќ во книжевната критика и во медиумите“ и „Македонски писанија“, кои треба да бидат објавени до крајот на годината.
По промоцијата на „Се отвори небото: Поезија за Магда“ следеше свеченото отворање на изложбата на слики „Хималаи и словенечките планини во слика и збор“ на познатата словенечка сликарка Магда Шаламон, членка на ликовната секција на Културно-уметничкото друштво од Жалец, која накусо го претстави својот сликарски опус, кој се темели на нејзините 16 планинарски искачувања на Хималаите, како и на многубројните искачувања на словенечките планини. Изложбата во Музејот на град Скопје беше отворена до 18 овој месец. Инаку, Магда Шаломом е сестрана словенечка уметничка, хуманистка и космополитка, која на ТВ Велење досега има реализирано 233 авторски емисии под наслов „Допирите на планините“.
Свеченото отворање на Деновите на словенечката култура во Скопје беше крунисано со концертот на словенечката етно рок група „Dupljak Village Orchestra“ од Радече под раководство на Алеш Брезникар, кој на македонската јазност е познат по организацијата на традиционалната туристичко-културна манифестација „Словенија на Охрид“.
Деновите на словенечката култура во Скопје беа окончани на 17 овој месец со концертот во Културно-информативниот центар на светски познататата словенечка виртуоска Тања Сонц, постојана членка на оркестарот на филхарномијата од Цирих, и на нејзиниот квартет.