Израелскиот премиер Бенјамин Нетанјаху вечерва во обраќање до јавноста им порача на граѓаните дека можат да ги напуштат засолништата, откако нов бран ирански ракети прелетаа над израелска територија како одговор за жестокиот удар на Израел врз Техеран денеска.
Иранскиот режим никогаш не бил послаб. Ова е можност иранскиот народ да му се спротивстави на режимот, рече Нетанјаху во вечерашното обраќање.
Тој, според АФП, повтори дека израелските сили денеска елиминирале клучни воени и научни личности на иранскиот режим во последните 24 часа, вклучувајќи високи команданти и нуклеарни научници.
Нетанјаху нагласи и дека се обраќа на „гордиот народ на Иран кој речиси 50 години страда од репресијата на режимот“, кој сега, според него, „го загрозува самото постоење на државата Израел“.
Израелскиот министер за одбрана, претходно изјави дека Иран „преминал црвена линија со лансирање ракети кон израелските цивилни области“ и најави дека Техеран ќе плати висока цена.
Иранската одмазда следеше по израелските воздушни напади на иранска територија, за време на кои беа погодени нуклеарни постројки, а беа убиени високи команданти и научници.