Откако синоќа претседателот на СДСМ Венко Филипче објави 11 кандидати за градоначалници на престојните локални избори, а во нив го нема актуелниот градоначалник на Струмица, Костадин Костадинов, објави дека го замрзнува членството во СДСМ и најави дека ќе започне со креирање на ново интерпартиско делување, кое ќе биде презентирано по завршувањето на локалните избори, пренесува Фронтлајн.
Мојата партиска припадност од денес е замрзната во СДСМ, не со ова раководство, не додека СДСМ не се врати таму каде што и е местото, најмалку каде што е сега. Ова не е крај… Во сегашната политичка слика, мојата кандидатура – од било која партија – е бесмислена. Не затоа што се плашам од пораз. Јас не знам што значи да изгубиш избори. Туку затоа што нема вистинска понуда за градот. Нема суштинска дебата. Нема нова визија. Нема предизвик, објави Костадинов на Фејсбук.
„Свесен за тешката состојба во која се наоѓа мојата партија, од безидејноста, сакам да помогнам за жал нема како… Во следните месеци, ќе започнам со креирање на ново интерпартиско делување, кое ќе биде презентирано по завршувањето на локалните избори. Целосно прецизна стратегија, доволно мотивирачка за да обедини авторитети што ѝ недостигаат на СДСМ, тешки за да бидат непривлечни за политичките авантуристи, и доволно забавни за да се пронајдат младите… Мојата стратешко политичка одлука за делување во СДСМ или можеби надвор од СДСМ ќе биде јавно кажана во два дела. Првата ќе биде септември, конечната по завршување на овие локални избори. До тогаш посакувам среќа да се победи во барем една општина“, вели во објавата Костадинов.
За порталот Струмица онлајн, Костадинов изјавил дека „сите опции се отворени. Останува одлуката да се направат консултации за независна кандидатура“.
„Има време прво да се преиспита сегашната состојба и да се направи стратегија, па ќе се делува согласно граѓанското мислење. Можно е да се поддржи листа, да се направи независна листа, а можно е и нова кандидатура“, рече Костадинов.
Во Струмица, како што истакна Филипче, кандидат за градоначалник ќе биде претседателот на општинската организација, Марјан Даскаловски.
Ј. Ѓ. / Фронтлајн