Учесниците на конференцијата за економско закрепнување на Украина, што се одржува во Рим, ветија повеќе од 10 милијарди евра за помош на земјата разорена од војна, изјави денес италијанската премиерка Џорџа Мелони.
Верувам дека треба да бидеме горди на резултатот што го постигнавме денес заедно – нациите, меѓународните организации, финансиските институции, локалните власти, деловниот сектор и граѓанското општество, рече Мелони во својот говор на отворањето на конференцијата.
Заедно, на денешната конференција, презедовме обврски во вкупен износ од над 10 милијарди евра , рече италијанската премиерка.
Соединетите Американски Држави за прв пат ќе учествуваат на состанок на „коалицијата на волните“, најави италијанската премиерка Џорџа Мелони.
Во исто време, според Ројтерс, Мелони нагласи дека притисокот врз Русија мора да продолжи, преку санкции, за да се постигне мир.
Патот за нас е јасен: да продолжиме да ја поддржуваме Украина, а во исто време да го одржуваме или зголемуваме притисокот врз Русија, главно преку санкции, рече таа, разговарајќи со новинарите заедно со украинскиот претседател Володимир Зеленски по почетокот на конференцијата во Рим за закрепнувањето на Украина.
Се забележува дека „Коалицијата на волните“ е иницијатива на европските земји кои се стремат да ја зајакнат поддршката за Украина и во неа се вклучени: Франција, Велика Британија, Полска и балтичките земји.
Конференцијата за закрепнување на Украина се одржува оваа година во Рим, со фокус на зајакнување на Киев и пошироките напори за повоена обнова. Над 3.500 учесници – вклучувајќи шефови на држави, влади, меѓународни организации и бизниси – се собираат во Вечниот град, зајакнувајќи го дијалогот преку тркалезни маси и билатерални контакти.
Украинскиот претседател Володимир Зеленски претходно пристигна во Рим на средба со папата и со италијанскиот претседател, додека германскиот канцелар Фридрих Мерц, претседателката на Европската комисија Урсула фон дер Лајен, полскиот премиер Доналд Туск и грчкиот премиер Киријакос Мицотакис се меѓу присутните лидери.
Од друга страна, има значајни „отсуства“ на овогодинешниот настан.
Доналд Трамп не присуствува лично и него го претставува неговиот специјален претставник, Кит Келог додека турскиот претседател Ердоган исто така е отсутен и покрај „личната покана“ од Џорџија Мелони.
Францускиот претседател Емануел Макрон и британскиот премиер Кир Стармер учествуваат преку видеоконференција од Лондон.