Приштина: Ниту денешниот 46-ти обид за конституирање на Собранието на Косово не успеа, со што дополнително се продлабочува политичката и институционалната криза во земјата.
Како и во повеќето претходни случаи, и на денешната седница од 82 присутни пратеници, само 43 гласаа за формирање на комисија за избор на претседател на парламентот со тајно гласање, по што претседавачот на конститутивната седница, Авни Дехари, ја прекина седницата.
Продолжението на седницата, односно наредниот обид, Дехари го најави за вторник, 15 јули.
Демократската партија на Косово, Демократскиот сојуз на Косово, Српска листа и коалицијата Алијанса за иднината на Косово и НИСМА и денеска одбија да предложат членови на комисијата, додека нивните пратеници воопшто не учествуваа во гласањето.
Според одлуката на Уставниот суд на Косово, крајниот рок за конституирање на парламентот е 26 јули.
Претседателката на Косово, Вјоса Османи, најави дека ќе се обрати до Уставниот суд со прашање што треба да се преземе доколку до тој рок парламентот не се конституира.