Амбасадата на Украина во Република Северна Македонија, во соработка со Католичката црква во земјава, денеска ќе одржи свечена церемонија по повод Денот на независноста на Украина.
Настанот ќе ги обедини дипломатите, украинската заедница и пријателите на Украина во заедничка порака за слобода и отпор.
Програмата ќе почне напладне во Католичката црква во Скопје со интонирање на химните на Украина и на Северна Македонија, а со минута молк ќе им биде оддаена почит на паднатите херои на Украина.
Амбасадорката на Украина, Лариса Дир, ќе им се обрати на присутните, а Бискупот Киро Стојанов ќе одржи молитва за украинскиот народ.
Најавено е и обраќања на претставници на Владата на Републикја Северна Македонија и на претседателот на украинската заедница во земјава, Олександр Урбанович.
Културниот дел од програмата ќе го збогати пијано-рециталот на украинскиот пијанист Игор Панченко како и изложбата „Пред / После“ на Украинскиот институт, а која сведочи за уништеното културно наследство на Украина како последица на руската агресија.
Амбасадата и нејзините партнери ќе ја искористат оваа прилика и за промоција на кампањата за прибирање средства, иницирана од Министерството за надворешни работи на Украина и платформата UNITED24. Кампањата има за цел да обезбеди спасувачки роботски системи за украинските единици кои ќе вршат евакуација на ранетите, снабдување и деминирање во најопасните подрачја.
Настанот ќе заврши со повик за солидарност со Украина во нејзината борба за слобода, независност и демократија.
Фото: Скопје, од ланското одбележување на Денот