Во рамки на 44-тото издание на фестивалот ќе настапат легендарниот гитарист Марк Рибо и Кахил Ел Забар, На финалната вечер, Вадада Лио Смит, денес најголемиот жив американски џез музичар и Џејмс Брендон Луис, неодамна прогласен за музичар и тенор саксофонист на годината. Фестивалот ќе биде отворен со настапот на Анджеј Јагоѓински трио, еден од најдобрите полски пијанисти, композитор и аранжер и концертот на нашиот Национален џез оркестар под водство на австрискиот диригент Зиги Фајгл, а како гостин солист ќе биде Луис Бониља.
Покрај концертите, Скопскиот џез фестивал и оваа година нуди и филмска програма, документарни филмови кои ги истражуваат духовните и културните корени на џезот и неговата трансформација низ децениите.
Главна цел во конципирањето на програмата беше да се задржи култниот статус кој го има фестивалот во Европа и во светот, рече Белопета.
Се работи за продолжување на концептот кој е генерално програмски концепт свртен кон современиот, тоа е едно, под број два актуелноста, а тоа значи дека практично сите кои доаѓаат имаат оваа година или лани некои нови остварувања кои оставиле силен белег на сцената. Значи изборот не е случаен. Се разбира во концептот спаѓа и ексклузивноста, затоа што ако прочитате има многу ексклузивни настани на фестивалот, рече Оливер Белопета, директор на „Скопски џез фестивал“.