На Германија не ѝ се потребни „советi од странство“, изјави денес германскиот министер за надворешни работи Јохан Вадефул, реагирајќи на „Националната одбранбена стратегија“ презентирана претходно од администрацијата на американскиот претседател Трамп, која предвидува „цивилизациско исчезнување“ на Европа и ги напаѓа вредностите на континентот, пренесува Дојче веле.
„Прашања како што се слободата на изразување или организацијата на нашите слободни општества“ не можат да бидат предмет на дискусија од страна на Вашингтон, изјави Вандевол за време на прес-конференцијата во Берлин со неговата исландска колешка Катрин Гунарсдотир.
„Исто така, не веруваме дека некој треба да ни дава совети за ова прашање, бидејќи тоа е определено од нашиот уставен поредок“, додаде германскиот министер.
Во документот насловен како „Национална одбранбена стратегија“, Трамп остро ги напаѓа Европејците и отворено ги поддржува противниците на вредностите што ги промовира ЕУ, особено кога станува збор за имиграцијата.
„Доколку продолжат сегашните трендови, (европскиот) континент ќе биде непрепознатлив за 20 години или помалку“, нагласува овој текст, во кој се проценува дека постои ризик од „цивилизациско исчезнување“ на Европа.
„САД се и ќе останат наш најважен сојузник во НАТО“, нагласи Јохан Вадефул, но алијансата „се фокусира на прашања од одбраната и безбедноста“, додаде тој.
Германија придава големо значење на присуството на слободни медиуми на нејзина територија, истакна германскиот министер, едно од прашањата што неодамна предизвикаа тензии со Вашингтон. Во септември, германскиот министер за надворешни работи поддржа „слободен“ печат во сите земји, вклучително и во САД, во време кога Белата куќа размислуваше за намалување на времетраењето на визите издадени на странски новинари.