СДСМ оцени дека најновите регионални инфраструктурни договори меѓу Грција, Бугарија и Романија, како и „претставената програма на ВМРО-ДПМНЕ“, испраќаат иста порака – дека Македонија ризикува да стане, како што велат, „црна точка на Балканот“.
Од партијата потсетуваат дека трите земји членки на Европската унија го потпишаа Меморандумот за коридорот Црно Море – Егејско Море, кој предвидува модернизација на железничката, патната и пловната инфраструктура во правец север-југ.
Ова значи дека сите од ЕУ ќе ја заобиколуваат Македонија. Нема да има прилив на пари од транспорт низ земјава, помал прилив од патарини, од точење бензин и од другите придружни активности, соопштува СДСМ.
Во партиското соопштение се наведува дека и втората важна вест – програмата „Македонија 2030“ на ВМРО-ДПМНЕ – го носи истиот заклучок.
Што имаат заедничко двете вести? Македонија – црна точка, стои во реакцијата, во која СДСМ потсетува дека ваквиот знак, кој во ЕУ речиси исчезнал, на големи врати се враќа во Македонија.
Според партијата, „црна точка“ означува место со висок ризик за граѓаните, но и симболичен статус на држава што е изолирана од европските процеси.
Како кратка делница на патот кон ЕУ, која најчесто е изолирана, најмногу од Европската унија и демократскиот свет, а многу често и од сопствените граѓани – поради криминал, корупција и сиромаштија, порачаа од СДСМ.
Во соопштението се додава и политичка оцена за вчерашниот конгрес на ВМРО-ДПМНЕ во Кавадарци.
Ова е само дел од програмата Македонија 2030, претставена од стариот и новиот будимпештански шоферски тандем – зад воланот Груевски и Мицкоски, како некогаш популарната серија ‘Камионџии’“, се наведува во реакцијата.
Од СДСМ оценуваат дека таквата политика „сигурно нема да им одговара на граѓаните“, но „можеби ќе биде добра за мигрантите – сообраќајот да не ги вознемирува“.