Сенатот на Соединетите Американски Држави денеска со големо мнозинство усвои закон за национална одбрана вреден 901 милијарда долари и го испрати во Белата куќа на потпис.
Американскиот претседател Доналд Трамп веќе изјави дека ќе го потпише законот, со што тој ќе стапи во сила.
Сенатот го одобри предлог-законот со 77 гласа „за“ и 20 „против“, со поддршка од двете партии. Претходно, минатата недела, законот беше усвоен и во Претставничкиот дом.
Со законот се предвидуваат рекордни воени трошоци, меѓу кои и зголемување на платите на воениот персонал за четири проценти, инвестиции во вооружување и мерки за зајакнување на конкурентноста на САД во однос на Кина и Русија.
И покрај Стратегијата за национална безбедност на администрацијата на Трамп, објавена претходно овој месец, и преиспитувањето на односите со Европа, законот содржи одредби за јакнење на безбедноста на европскиот континент.
Во него се предвидуваат 800 милиони долари за Украина – по 400 милиони долари за секоја од следните две години. Средствата ќе се доделуваат преку механизам со кој се финансираат испораки за Киев од американски компании за производство на оружје.
Законот предвидува и 175 милиони долари за Балтичката безбедносна иницијатива, наменети за поддршка на одбраната на Летонија, Литванија и Естонија. Со законските одредби се ограничува можноста бројот на американските војници во Европа да се намали под 76.000, а истовремено се забранува командантот на американските сили во Европа да се откаже од функцијата врховен командант на НАТО.
Предлог-законот не ја вклучува идејата за преименување на Министерството за одбрана на САД во Министерство за војна, предлог што претходно го лансираше Трамп. Сепак, во текстот е вклучена одредба со која им се забранува на трансродови жени да учествуваат во женски спортски програми во рамки на воените академии.