Иранската револуционерна гарда објави дека нивната морнарица утрово погодила американски танкер во северниот дел на Персискиот Залив.
Во соопштението се вели дека воените и комерцијалните бродови на Соединетите Американски Држави, Израел и европските земји кои ги поддржуваат „нема да можат да поминат“ низ областа.
„Ако ги забележиме, дефинитивно ќе бидат погодени“, соопшти Иранската револуционерна гарда.
Додадоа дека Иран претходно предупредил дека во време на војна има право да го контролира преминот низ Ормутскиот теснец.
„Веќе рековме дека, врз основа на меѓународните закони и резолуции, Исламската Република Иран ќе има право да го контролира преминот низ Ормутскиот теснец во време на војна“, соопшти Иранската револуционерна гарда, според иранската новинска агенција Тасним.