Откако не успеа јасно да дефинира цел или стратегија за излез, и да ја убеди целата американска јавност во оправданоста за нова војна во Иран, претседателот на САД, Доналд Трамп се најде во неволја, само неколку недели по почетокот на конфликтот, поради погрешна проценка на капацитетот на Иран за широка одмазда, пишува француската новинска агенција АФП.
Дополнителен притисок е оставката во вторник на висок американски функционер за борба против тероризмот, кој јавно изјави дека Иран не претставува „непосредна закана за нашата нација“ и дека не може „со чиста совест да ја поддржи сегашната војна во Иран“.
Трамп постојано повторуваше дека Иран е „десеткуван“ од нападите на САД и Израел, сугерирајќи дека може да прогласи победа. Но, републиканскиот лидер не отиде толку далеку, и со добра причина. Потребни се двете страни за да се заврши војната, освен ако противникот не капитулира, анализира медиумот. Иран, иако сериозно ослабен воено и политички од серија воздушни напади што започнаа на 28 февруари, не покажа знаци на предавање. Иако Трамп рече дека САД ја уништиле иранската морнарица, нејзините балистички ракети и голем дел од нејзиното раководство, американските медиуми објавија дека тој не го предвидел целосно преостанатиот капацитет на Иран за широка одмазда.
Тоа, според написите, би можел да биде вистинскиот проблем за Трамп. Како што војната влезе во третата недела, цените на нафтата пораснаа додека насилството се прошири низ Блискиот Исток, од Либан до Заливот, вклучувајќи ги и нападите врз амбасадата на САД во Ирак. Американскиот претседател сега ја плаќа цената за тоа што се залага за Израел без мандат или консултации со Конгресот или другите глобални сојузници на САД. Европејците и другите сојузници учтиво ги отфрлија барањата на Трамп за помош во Ормускиот теснец, тесниот воден пат во Заливот што Иран ефикасно го блокираше.