Амбасадорката на Украина во Северна Македонија, Лариса Дир, повика на поддршка на меѓународната иницијатива #WarmthForUkraine, предупредувајќи на руските напади врз енергетската инфраструктура пред зимата. Една од конкретните потреби е генератор за амбулантата во украинското село Чистопил, на околу 20 километри од фронтовската линија.
Во својата објава на X, амбасадорката Дир наведува дека само минатата недела руските сили ја нападнале Украина со 1.600 авиобомби, 48 ракети и 2.300 дронови. Таа предупредува дека една од главните цели на нападите е уништувањето на украинската енергетска инфраструктура пред почетокот на зимата.
„Ве молиме да ги поддржите Украинците преку #WarmthForUkraine“, порача Дир.
Само минатата недела рф истрела врз 🇺🇦 1600 авиобомби, 48 ракети и 2300 дронови. Една од главните цели на рф е уништувањето на 🇺🇦енергетска инфраструктура пред почетокот на зимата. Ве молиме да ги поддржите Украинците преку #WarmthForUkraine. Повеќе: https://t.co/bOOyPMbLOI https://t.co/dF4w6eEsDm
— Larysa Dir (@dir_larysa) October 26, 2026
Меѓународна иницијатива за топлина и светлина
Иницијативата #WarmthForUkraine — Топлина за Украина е покрената заеднички од Министерството за надворешни работи на Украина и Светскиот конгрес на Украинците (Ukrainian World Congress) и се надоврзува на проектот „Топлина од Полска за Кијив“.
Според официјалниот повик, средствата се наменети за набавка на генератори и друга неопходна енергетска опрема за украинските заедници, болниците, училиштата и објектите на критичната инфраструктура на кои итно им се потребни сигурни извори на електрична енергија.
Повикот е упатен до меѓународните партнери, приватните компании, финансиските институции, фондациите и деловните мрежи. Целта е да се обезбедат топлина и светлина за луѓето што ги трпат последиците од продолжените руски напади врз украинскиот енергетски систем.
Генератор за амбулантата во Чистопил
Во рамките на иницијативата, актуелниот повик објавен на веб-страницата на Македонски Каритас е насочен кон набавка на генератор за амбулантата по општа медицина во селото Чистопил, во Никополскиот реон на Днипропетровската област.
Нападите врз цивилната, критичната и енергетската инфраструктура предизвикуваат прекини во снабдувањето со електрична енергија, греење и вода. Со приближувањето на ниските температури, обезбедувањето непречена работа на здравствените установи станува уште поитно.
Генераторот ќе ѝ помогне на амбулантата да продолжи со работа за време на прекините на струјата и да обезбеди соодветни услови за медицинска помош за локалните жители, кои живеат на околу 20 километри од линијата на фронтот.
Како да помогнете
Донациите за оваа намена се уплаќаат на сметките на Македонски Каритас, со назначена цел „Помош за Украина“.
Денарска сметка
Фондација МАКЕДОНСКИ КАРИТАС Скопје
Ул. Петар Попарсов бр. 43, МК – 1000 Скопје
Трансакциска сметка: 300000004360186
Цел на дознака: Помош за Украина
Девизна сметка
Корисник: Fondacija MAKEDONSKI KARITAS Skopje
Адреса: Petar Poparsov br. 43, 1000 Skopje
Банка: Komercijalna banka AD Skopje
Адреса на банката: Orce Nikolov br. 3, Skopje
SWIFT: KOBSMK2X
IBAN: MK07300701003596824
Број на сметка: 0270100359682
Цел на дознака: Aid for Ukraine
ЦИВИЛ: Да ја претвориме солидарноста во конкретна помош
ЦИВИЛ – Центар за слобода, кој уште на почетокот на 2026 година се вклучи во иницијативата #ТоплинаЗаУкраина во координација со Амбасадата на Украина, го обновува повикот за солидарност и конкретна поддршка.
ЦИВИЛ ги повикува своите членови, поддржувачи и читателите, како и компаниите и институциите во Северна Македонија, да се приклучат на иницијативата #WarmthForUkraine и да помогнат во набавката на генераторот за амбулантата во Чистопил.
Донирајте според вашите можности. Споделете го повикот со пријателите, колегите и соработниците. Поттикнете ги вашите компании и институции да придонесат. И малите донации, здружени, можат да обезбедат значајна помош.
За луѓето во Чистопил, генераторот значи можност амбулантата да продолжи да работи кога ќе снема струја, а здравствените работници да останат достапни за пациентите.
Да помогнеме светлата да останат вклучени таму каде што се лекуваат луѓе.