Руската Амбасада во Македонија соопштува дека со загриженост ги примила соопштенијата за ескалирање на политичката спротиставеност во Македонија, и за како што велат, немирите кои се случија во Скопје.
Амбасадата ги повикува сите страни на политички дијалог и непровоцирање на нови изливи на кризата која трае веќе повеќе од една година.
– Констатираме дека македонската опозиција повторно стана инструмент на распалување на внатрешно политички конфликт, меѓу другото и со надворешна поддршка, со цел да не дојде до одржување на предвремените избори на 5 јуни кои претставуваат единствен демократски и легитимен излез од долгата криза, се вели во соопштението на Амбасадата, која потенцира дека одржувањето на изборите е договорено во 2015 година, со активна помош од САД и ЕУ.
Руската Амбасада потенцира дека западните партнери морале да ги почитуваат постигнатите договори и своите обврски што ги имаат преземено во тој контекст.
– Сметаме дека е недозволиво да се разнишува кревката ситуација во Македонија поврзана со комплицираната етничка и верска структура на земјата. Активирање на „украинското сценарио“, надворешно инспирирање на незаконски дејствија и на државни удари може да доведе до сериозни потреси во Македонија, како и до дестабилизирање во целиот Балкански регион, се вели понатаму во соопштението.
Тие ги повикуваат сите политички сили и претставници на Меѓународната заедница да го следат патот на решавање на внатрешната македонска ситуација со мирни средства, со почитување на дејствијата и на одлуките на, како што ги квалификуваат, легитимните власти и на македонското раководство.