Пред седиштето на Специјалното јавно обвинителство денеска започна осмиот протест на граѓаните организиран од над 80 невладини организации и граѓански здруженија како револт на одлуката на претседателот Ѓорѓе Иванов за аболиција на политичарите од власта и опозицијата пред избори.
Пред Специјалното обвинителство, составено како последица на Договорот од Пржино демонстрантите изразуваат поддршка со цел да си ја завршат работата и да ги решат сите сомневања за криминал кои произлегоа од нелегално прислушуваните материјали.
Изминатава недела протестите започнуваа токму од овде а потоа продолжуваат ад-хок на разни локации кои за кои се одлучува на разглас.
– Ние, граѓанките и граѓаните кои во борбата за правда и демократија, здружени протестираме низ улиците на Македонија во име на слободата, правдата и еднаквоста, нагласуваме дека преговори во овие услови се неприфатливи. Затоа, одлучно продолжуваме со протести и бараме: Итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО); Итна и неотповиклива оставка на Ѓорге Иванов од функцијата Претседател на Република Македонија; Произнесување на Уставниот суд за уставноста на СЈО; Формирање на специјално одделение на Кривичниот суд, кое ќе биде надлежно за случаите под јурисдикција на СЈО; Итно повлекување на одлуката за одржување на парламентарни избори на 5 јуни; Задолжително вклучување и присуство на независни претставници на граѓанското општество во процесот на решавање на кризата; Формирање на преодна влада која докрај ќе ги имплементира итните реформски приоритети од извештајот на Прибе. Дотогаш, нашата политичка борба останува на улиците. Нема правда, нема мир!
#Протестирам #Protestoj, се вели во повикот на организаторите.
