Шарената револуција трае веќе над еден месец. Ивана речиси секој ден можете да ја видите пред седиштето на Специјалното јавно обвинителство како и предводничка на марширањата кои се одвиваат низ улиците на главниот град. Има 30 години и работи во приватна фирма. За ова, таа вели граѓаните треба да разберат дека револуцијата се одвива за многу поголема кауза: за оспорените права на граѓаните, за селективната правда, за приватизирањето на државата, за Тамара…и затоа според неа луѓето не треба да бидат безгласна буква, да се тргнат од комодитетот и да излезат да протестираат за иднината и општеството, без разлика во каква финансиска или општествена состојба се.
Гоце од друга страна е бизнисмен кој живее и работи во Њу Џерси, САД, повеќе од 20 години. Гоце, по потекло од Охридскиот регион, за разлика од Ивана, вчера за прв пат се појави на Шарената револуција, и тоа 2 часа откако слетал на аеродромот во Скопје. Тој вели промените се неопходни а потребни се луѓе кои ќе раководат без манипулации и лажни ветувања. Досега имал средби и со политичари од власта и од опозицијата во САД но граѓаните треба да потенцираат кога сметаат дека некои работи се погрешни.