Демонстрантите вечерва упатија неколку барања и поставија рок до кога да се исполнат. А, тоа е 18 јуни.
Првото барање е Уставниот суд да се произнесе за уставноста на Специјалното јавно обвинителство, бидејќи е под ризик да се прогласи за неуставно.
Второто барање е да се запре прогонот врз демонстрантите. Да се ослободат сите приведени и да се повлечат кривичните пријави од МВР. „Нашите соборци седат во притвор повеќе од еден месец. Оваа хајка мора да престане“, изјавија од Шарената револуција.
Трето барање, оставка од Владата на ДУИ и ВМРО ДПМНЕ и формирање на преодна влада, потоа четврто барање, формирање на специјално одделение во Кривичниот суд за случаите под јурисдикција на СЈО.
Петто барање е задолжително присуство на граѓаните при решавањето на кризата.
Шесто барање е оставка од Претседателот Иванов.
Демонстрантите најавија разни форми на протести, а во среда напладне ќе се блокира сообраќајот во Скопје, како симболика дека живееме во блокирана држава.
По соопштување на барањата, граѓаните му оддадоа почит на Мартин Нешковски и како што рекоа сите жртви на овој режим.