Само 5. 022 спорни гласачи од вкупно 39. 502 до денеска се пријавиле во Државната изборна комисија (ДИК) со цел да го докажат своето право на глас.
Согласно Пржинскиот договор, оние гласачи кои се најдоа на листата на сомнителни записи, а нема да се пријават електронски или лично во ДИК заклучно до 19. август, односно петок, ќе бидат избришани од списокот и нема да имаат право на глас на следните избори.
Според поранешниот претседател на ДИК Александар Новаковски, Државната изборна комисија ќе треба двапати да размисли пред да пресече дека тие лица кои не се пријавиле се непостоечки и треба да се избришат од Избирачкиот список.
-Прво е неинформираноста на граѓаните. ДИК ја почна кампањата многу доцна. Ако не се докаже дека овие лица не постојат, тие не може да се избришат туку така, бидејќи правото на глас, загарантирано со Уставот е над сите законски измени донесени врз партиски договор. Државата е должна да направи се, па ако треба ДИК и поединечно да констатира за секој гласач и да образложува за да се утврди зошто едно лице би немало право да гласа, вели Новаковски.
Универзитетскиот професор Темелко Ристовски исто така смета дека Државната изборна комисија не смее да се задоволи со тоа што рокот ќе помине и веднаш да се избришат од Избирачкиот список спорните гласачи.
Времето е кратко и нема никаква шанса да се пријават сите спорни гласачи. ДИК мора да внимава и во кристално чиста и јасна фактичка состојба да утврди дека еден гласач не постои и да го избрише од избирачкиот список, но тоа е тешко. После истекот на овој рок, даден во летни периоди, ДИК мора да вложи напори, ако треба и додатни рокови и вкрстени проверки со цел што е можно повеќе граѓани да се пријават, бидејќи доколку некој граѓанин подоцна докаже дека има право на глас, а не е на Избирачкиот список, практично би значело дека со оневозможувањето да гласа, се крши Уставот, вели Ристовски.
Тој апелира ДИК да ги искористи сите начини на пропаганда за да се допре до граѓаните во периодот што претстои.
Граѓаните кои се на списокот на спорни гласачи до петок може да се пријават лично, во подрачните единици на Државната изборна комисија, како и во канцелариите на Управата за водење на матични книги, каде ќе мора да приложат важечка лична карта или пасош.
Втора опција е пријавување на веб страницата на ДИК каде поставена е и апликација за електронско пријавување. Тие ќе треба да го внесат матичниот број и да испратат скенирана копија од лична карта или пасош.
Пријавувањето може да се врши секој ден во периодот од 8.30 до 19 часот.
Според партискиот договор, во делот за Избирачкиот список три или повеќе члена на ДИК можат да побараат дополнителна проверка за кое било име.
Спорниот гласач може да биде побарано да се појави лично ако живее во земјата или преку видеоконференција ако живеат во странство.
Овие проверки ќе траат дополнителни 10 дена по 25-дневниот период за пријавување кој истекува овој петок.
Партискиот договор за спроведување на избори наиде на критики кај стручната јавност, но и пратениците во Собранието. За време на гласањето на измените, независната пратеничка Грчева ги повика граѓаните да се пријавуваат маскирани преку Скајп, а доколку ги нема на избирачкиот список, а имаат право на глас да ги тужат партиите.