Австрискиот министер за внатрешни работи се закани дека ќе ја тужи Унгарија ако одбие да ги преземе мигрантите кои ја поминале границата меѓу тие две земји.
Австриските власти, соочени со предизвикот на екстремно десничарската Слободарска партија, ја обвинија Унгарија дека ги пропушта мигрантите на австриската територија, и покрај правилата на ЕУ дека барателите на азил мора да останат во првата земја во која стасале влегувајќи во просторот на Унијата.
Унгарија, која се подготвува за референдум за тоа дали треба да ги прифати европските бегалски квоти, нагласува дека поголем дел од бегалците влегуваат на нејзина територија од останатите земји на ЕУ, најмногу од Италија и Грција.
„Државите кои непрекинато го кршат законот мораат да очекуваат и правни последици“, изјави министерот за внатрешни работи на Австрија Волганг Соботка, одговарајќи на прашањето за унгарското одбивање на бегалците.
„Во тој случај, Австрија треба да поднесе тужба.“, додава тој.
Будимпешта изгради ограда долж границата со Србија која не е членка на ЕУ, за да го спречи приливот на бегалци.
Портпаролот на унгарската влада го отфрли повикот на Соботка тврдејќи дека поголем дел од мигрантите најпрвин доаѓаат во други земји во ЕУ.
„Унгарија не може и нема да прифати одговорност и да трпи последици поради неодговорноста на други земји членки – Австрија и Германија, кои сугерираа игнорирање на правилата или останатите земји како Грција, кои ги занемарија своите обврски“, изјави портпаролот.
Германија и Австрија првично примија многу бегалци од Блискиот исток и Авганистан. Виена ги заостри правила за добивање на азил претходно оваа година и воведе годишен лимит за бројот на баратели на азил.
Тие чекори, кои на големо ги критикуваа организациите за човекови права и ЕУ, уследија откако порасна поддршката на десничарската Слободарска партија во однос на владејачката центристичка партија.
Кандидатот на Слободарската партија Норберт Гервалд би можел да стане првиот европски крајно десничарски претседател на државата на претседателските избори на 2 октомври, на ист ден кога во Унгарија се одржува референдум.